Minggu 4 Set. Trinitatis
15 Juni 2008
Poda 6:20-29
(Pdt. M. Lumban Gaol, S.Th)
“Dalan tu hangoluan do pinsangpinsang ni pangajaron”

Patujolo:
Ndang adong natoras namansangkapi na roa tu ianakhonna, baliksa tahe dihalojahon natoras do mangula pasarisari inakhon, martaon udan las ni ari asa taruli ianakhonna jala boi dumenggan parngoluonna tu joloan on. Ndada holan manghalojahon mangalului parngoluon siapari, dohot do tahe mangaramoti pardalanan ngolu ni ianakhonna i marhite na mamodai, manogunogu jala sipata mamuruhi ianakhon i dipangalangka/panghataion naso denggan. Boasa songon i ? Asa sahat muse ianakhon i tu parngoluan na dumenggan jala gok las niroha.
Tung mansai dihaholongi Debata do angka natinompai, jala dirajumi do hita gabe anakhonNa (pat. 1 Joh 3:1-2). Alani i ma tung diharingkothon Debata do sai mamatamatai ngolunta jala mamodai hita ganup tingki di portibi na gok elaela namamboan hita tu jorgong laos pamatehon hita.

Hatorangan:
1. “Ringkot ni mangaradoti tona poda ni natoras”
Najolo, ala tung atur do laho mardahanpogu (marsipanganon) ganup keluarga (muse hinorhon ni maol ni parngoluon) sai rap marsipangon do keluarga pinomat mangan botari. Laos dipartingkian on do tangkas parsaoran ni keluarga i jala dison ma kesempatan ni natoras muse mamodai angka ianakhon. Nuaeng, ala naung adong pangalompaan listrik jala ala ni kesibukan, ndang pola piga be angka keluarga na patupa makan bersama manang rap marpungu natoras dohot inakhon, lam ma patupa kebaktian keluarga. Jala muse hinorhon ni ponjot ni ari ari laho pasarisari parngoluan on bo do lam paholang parsaoran ni natoras tu ianakhon. Boi doitangkas tarida isara di ari minggu naung tongtong dipangke tingki parmingguon i gabe tingki mangalului parngoluon siapari, ndang pola dirohahon natoras atik na laho do angka ianakhonna tu parmingguan manang gabe medangedang.
Dimasa ni turpuk on, tung mansai dirohahon natoras do parngolon ni angka ianakhon jala dipamanat do angka langka-langkana marningot angka parmaraan nasonson humaliang namarrupahon haulion dohot natabo di portibi on. Jambar ni haposoon do tutu nasai manghamohophon patagashon hagigiot ni pamatangna, jala tung maol do i ditaon.
Di rohahon natoras na diturpuk on do pangalaho i jala tung dipamanat angka namasa dihumaliang angka jorat na boi manangkup hahisapon ni haposoon i ala ni ma tung diharingkothon laho manosoi ianakhon maniop, jala sai marngingot poda asa ingkon “duduk ma angka i tongtong tu bagasan roham, jala horunghorungkon tu rungkungmu.” (ay.2).

2. “sulusulu do tona i, jala patik i do panondang dalan tu hangoluan”
Isara molo mardalan sada kendaraan di jalan raya, so adong panondang, manang so marlampu kendaraan di masa holom ni ari ndang niantusan be manang boha parjadina. Sude nama tumpuronna, molo so manegai ugasan ni halak, manang mangalanggar jolma, olo do madabu gabe so sahat tu tujuan jala mambahen parmaraan tu halak manang tu dirina sandiri. Digombarhon do di turpuk on: tona dohot patik i doshon sulusulu dohot panondang. Tung tangkas do diboto panurat ni Poda on, parmaraan na adong humaliang na boi mangambati hasasahat ni dakdanakn tu masa depan na denggan, jala muse na boi manegai parngoluon ni ianakhon i. Doshon nang hita halak Kristen ditongatonga ni potibion marragam do dihumaliangta angka nauli idaon dohot natabo daion dibahen portibion, hape mambahen hita masuk tu bagasan jorgong ni Sibolis. Nunga masa nuaeng ala sosak ni parngoluon on angka naposo menjual diri jala asa boi muse ibana marheppy heppy doshon nalobian hepeng. Godang do tarela angka naposo mandai narkotik, bahkan tahe ndang holan naposo, dohot do natuatua martigatigahon narkoba ai tibu parohon pangomoan. Godang angka pejabat pemerintah, nang swasta tarela mangulahon korupsi asa boi daionna hinatabo ni portibion dohon lan naasing. Alai taida ma, sude do i marujung tu haporsuhon; ai ndang i dihalomohon TUHAN i dalan ni ngolunta.
Tapamanat ma songon na di dok Psalm 38:13, torop do nasai patahitahi naroa tu parngoluon ni halak naporsea asa madabu tu bagasan haporsuhon, alai boi do malua hita sian i molo sai gomos taramoti dirinta dibagasan haporseaon nasintong di Debata jala tapasahat pardalanan ni ngolunta on tu Debata huhut taoloi panuturionNa mangatur ngoluta (Poda 3:26 pat. 29:25, Heber 11:33).

3. “ngolu na marhabadiaon”.
Tung pangalaho naso haintopan do sibabijalang mulai sian najolo ro ditingki on. Ala so haintopan, pola do gabe dibahen pamarenta lokalisasi. Ndada holan boruboru na berprofesi sisongon i, dohot do nang baoa. Di dok ap. Paulus : Songon dakdanak sipangoloi ma hamu; unang ma paihutihut hamu be sangkapsangkap ni roha, uju di haotoonmuna najolo... dohot ma hamu gabe badia ...(1 Pet.1:14-). Jotjot do hita dipaingot tu tolu “ta” ima hamaolon najumotjot diparngoluon on, : “tahta”, “harta” dohot “wanita”. “Tahta” ima namamboan tu pangunjunan na mangeahi huaso dohot hasangapon. “Harta” pangunjunan mangeahi hepeng dohot arta, “Wanita” pangunjunan na nanaeng papuashon haggiot ni pardagingon (kenikmatan sex). Ingot ma hita namasa tu si Absalom namanghaliangi huaso ni among na si Daud, gabe mate dipukpuhi jala gantung di hau (2 Sam 18). Na hisap di huaso, agoon ni huaso do ibana. Masa do tongtong songon i nang di huria songon di angkai partai politik. Tung dihalashon sibolis pangago i do pangalaho nasongon i.
Di 1 Timotius 6:10, dipaingot do angka naporsea sotung impolaan di perak : “... gabe diaithon do godang na bernit tu dirina.” Ai dos do i namardebata sileban (Kolose 3:5). Suang songon i namaradophon sibabijalang, manang marsangkap na roa maradophon borboru dos do i tu namangalangkup (Mat. 5:28).
Molo najolo sahit natubu ala ni pangalaho on, na boi pamalumon ni dokter dope. Alai diari parpudi on gabe tubu do sada sahit naso tarpamalum dope, ima AIDS. Jorbut ni sahit on, ndang pola pintor tarida nuaeng, alai lam leleng dung lam posa, tangkas ma i manegai daging ni jolma i jala so haubatan. Muse, dirarati sahit i do angka naso marsala (istri/suami dohot ianakhon). Alani i ringkot rohahononta pangalahonta, pangalaho ni ianakhon di masa saonari on; di na lam godang mara bolon manghaliangi ngolunta.

Panimpuli:
Tutu, metmet do panghilaan molo hona podaan. Alai taingot ma, tung mansai mambahen tu nadenggan do angka poda laho patigorhon angka langka naung sanga manimbil. Molo tung pe sipata sai hira nametmet panghilaan ala hona podaan, sudena i laho mamboan hita tu ngolu na dumenggan tu joloan ni ari. Tarlumobi tu angka ianakhon, songon hita angka naporsea naung gabe anak ni Debata. Naeng ma so hasurahan jala so marlaok hamu, angka anak ni Debata, angka na so marlindang di tongatonga ni sundut na geduk jala na marbalik; disi ma hamu marsinondang songon sisondangi portibi on! (pat. Gal 3:26, Filipi 2:15).
Di dok ap. Paulus muse: “Hamu angka anak, oloi hamu ma angka natuatuamuna di bagasan Tuhan i; ai i do na tigor.” Asa angka natuatua, naeng ma manjamothon angka ianakhon marhitehite namamodai dibagsan Tuhan jala tau tiruan di pangalaho dohot pangkataion. Ta undukhon do mangoloi padan dinamamboan ianakhonta i tardidi: “na olo do hamu mamodai ianakhonmuna on, jala gabe tiruan na denggan di nasida ?” alusta: “Na olo do ahu”.
Luhut angka naporsea, naeng ma mangeahi ngolu na marhabadiaon, jala manjamothon diri tu angka pangunjunan namarpardomuan tu “huaso, arta/hamoraon dohot hahisapon ni daging (sex)”. Ia angka na naeng gabe mamora, madabu do tubagasan pangunjunan dohot sambil dohot tu lan hahisapon haotoon, angka na mangago, na mangalonongkon jolma i tubagasan jea dohot hamagoan(I Tim. 6:9). Alai jaga hamu ma dirimuna, unang sorat rohamuna binahen ni parminumon dohot parmabuhon dohot panarihon di hangoluan on, gabe tompu ditahopi ari i hamu songon tali rambang. (Luk. 21:34).
Di dok ap. Paulus : “bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa, ro di pangahution” (Kol. 3:5), ai naung dipamate do hadirionta na buruk i jala naung dipahehe Kristus do hita gabe jolma naimbaru di haheheonNa i marhite pandidion. Songon panjangkonmuna di Kristus Jesus, Tuhan i, songon i ma hamu marparange di bagasan Ibana! Gabe marurat jala pinauliuli ma hamu di bagasan Ibana, togu marhaporseaon, hombar tu na niajarhon tu hamuna; lumobi ma hamu marroha mauliate! (Kol.2:6-7).
Sotung ma songon anak ni ihan i, naso manangihon poda ni indukna, papuashon hisap ni roha dohot dagingna, tarela manganhon sipanganon nauli di ida mata hape gabe tarhail laos mate. Ai nang jolma i ndang diboto hian ajalna, songon dengke tahe na dapot di bagasan jala pangago, jala songon pidong na dapot sambil, suang songon i taralit jolma manisia uju di tingki hinamago na maninggang nasida so pangkirimanna. (Parjamita 9:12.) Biar mida Jahowa do mual hangoluan, asa mandao angka jorgong ni hamatean. (Poda 14:27). Ai Jahowa do gabe haposanmu, jala Ibana mangaramoti patmu maradophon jorgong.( Poda 3:26). Amen.